Poznaj równie ciekawe jak i też długie i krótkie, śmieszne wiersze ze śląska specjalnie dla Was. To tutaj poznacie gwarę śląską oraz wiersze na wesela i inne okazje.
***
Czas, jak gupi nom ucieko,
Do wyborow niydaleko,
Już wychodzom szczury z nory,
Garnonć stołki i honory.
Czy pogodnie, czy dziyń chmurny,
Pódzie lud napełniac urny,
Marzeniami, nadziejami,
Choć niypewność lezie z nami.
Jo swoj program mom gotowy,
Jestech gotow do łodnowy,
„Jeszcze Polska…” głośno śpiywać,
Złote gory łobiecywać,
Ło farorzu piyknie pedzieć,
Fto kapowoł dobrze wiedzieć,
Wszystkich pognać do roboty,
Działać gipko, nic na potym.
Gizda zy mie dobry kawał,
Bez to byda sie nadawał,
Ludziom ciymnym wytłumacza,
Potym i tak wyłonacza.
Zelter bije mi do gowy,
Do rzondzynio jo gotowy,
Wuszt wyborczy już sie warzy,
A pod ślipsym mi do twarzy.
Prosza, groża, przipominom,
Chciołbych swojom rzondzić gminom,
Niych mie niy wykryśli ftory,
Musza wygrać te wybory!
***
Mjala oma logrodek, dziynnie tam chodziola.
Z wjosny siola jarzina, kartofle sadziola.
Kartofle sadziola, gnojym podlywala,
coby fajnie roslo i na zima mjala.
Mjala tyz tam drzewa grusze i jablonie,
wyglondaly pjyknie na bjolo bjelone.
Kwjotki tyz tam mjala, bo jim bardzo pszola
z rana je plewjola z wjeczora podlola.
Po grzondkach tyrala,robjola porzondki,
coby logrodek bol fajny, no i jeji grzondki.
Stola tyz tam lawka pjyknie posztrajchowano
oma na ni niy siodala ,bo bola zalotano.
A z wjeczora gibko do chalpy leciala,
bo czekala na nia dziecek calo zgraja.
Czekol tyz i opa calkym juz wnerwjony,
bo niy bylo wjeczerzy,ani jego zony.
Oma szybko chleba z tustym naszmarowala
i kazdymu do chleba tomata dala
I tak tom tomatom haja zazegnala.
***
Loto, tyro Pan Hilary, do dekla mu piere,
bo kaś ten boroczek stary, posioł swoje brely .
Szuko w galotach, kabot obmacuje
przewróciył szczewiki, psinco znejduje.
Bajzel w szranku i w bifyju
a już leci do antryju.
„ Kurde”- woło- „ kurde bele”
ktoś mi rąbnął moje brely .
Przewraco leżanka i pod nią filuje,
borok se wnerwił, gnatów już nie czuje .
Szuko w kafloku, kopie w kredensie,
glaca spocono, cały se trzynsie.
Diabelskie berle na amym kajś wcięło,
za oknym już downo blank se ściemnieło.
Naroz do zdzadła zaglsdo Hilary,
aż mu po puklu przefiurgły ciary.
Patrzi na kichol, po łebie se puko,
bo znejdły se brely, ty co ich tak szukoł.
Czy to nie ma gańba, no powiedzcie sami,
mieć brely na nosie, a szukać pod ryczkami?
***
Robił Alojz na grubie i niy myśloł chorować
bo tyn twardy wongiel, musioł durch fedrować
wiertoł dziury w ścianie, zakłodoł patrony
zapoloł cynsznura – a huku w pierony
a jak dymy wyszły, broł sie za łopata
i cIepoł na pancer, tak jak jego tata
łoba fedrowali tak jak gupie ciele
bo kieryś wymyślył – planowe niydziele
kcieli żyć jak ludzie, sił niy żałowali
a kożdy se myśloł – co to bydzie dali?
teroz sie doczkali takij smutnyj chwili
gruba jym zawarli , a łonych zwolnili
niy pomogły strajki i lamyntowanie
że stracili zdrowie na pierońskij ścianie
teroz Alojz żyje na grubowyj łasce
ponoś mo fedrować wongiel na Alasce
przi siarczystym mrozie i z eskimosami
cheba łogupieje pomiyndzy fokami
łociec niy pojedzie, bo już jest za stary
pod nosym mu przyńdom zielone dolary
za to Alojz jedzie po ciynżko robota
choć już na Alasce – downo nima złota
niyroz mu sie przyśni, ta ślonsko wodzionka
i tyn świyży chlebuś – łoćby z fetym kromka
a jak mu sie przyśni ło ślonskiym łobiedzie
pociepnie Alaska i nazod przijedzie
choć już w życiu tela ton wonglo wyromboł
bydzie z familoka na hołda zaglondoł
tela lot fedrowoł, w przodku i na ścianie
i niygdy niy myśloł – że ELWRYM łostanie
